Telegram 突然喺 App Store 消失：一則惡意舉報真係足以下架大型 app？

圖片：via The Verge — https://www.theverge.com/tech/975300/telegram-app-store-takedown-extortion-pavel-durov

TechLab 編輯部（譯）·2026-08-04

Apple 數小時內恢復上架，勒索說法暫時只有 Durov 一方證詞

Telegram 今個星期突然喺多個地區嘅 App Store 搜尋結果消失，幾個鐘後先重新上架。Apple 向 9to5Mac 確認，審查發現 Telegram 內有違反兒童性虐待內容規則嘅材料；Telegram 刪走內容同封鎖涉事帳戶後，Apple 就恢復上架。香港 App Store 嘅 Telegram 產品頁而家已正常顯示，不過未有可靠紀錄證明香港區當時受影響幾耐。

下架唔等於遙距刪 app

今次最易令人誤會嘅地方，係「App Store 下架」聽落似 Apple 封咗成個 Telegram。其實已經裝好 app 嘅用戶仍然可以開啟同收發訊息，Telegram 嘅 server 亦冇因今次處理而停運。短期影響主要落喺新下載同重新安裝；如果下架拖得耐，更新亦會受阻。今次幾個鐘就恢復，所以實際影響有限，但換機、刪 app 後想裝返嗰批人，就可能撞正空窗期。

圖片：Apple App Store

勒索攻擊係 Durov 嘅單方面講法

Telegram CEO Pavel Durov 話，涉事者先向群組管理員勒索，收唔到錢就用自動帳戶植入經 AI 修改嘅違法內容，再直接向 Apple 舉報。佢仲話對方編輯舊訊息，令內容埋喺活躍群組入面，普通成員較難察覺。呢套講法技術上唔係完全講唔通，但勒索、刻意植入同具體操作手法都未有獨立證據支持；Apple只確認搵到違規內容，暫時冇公開認同 Durov 對動機嘅描述。

Durov 將件事形容成惡意舉報者可以操控 Apple，呢句要打個折扣。Apple 話自己審查過內容，唔係收到一個 report 就由系統自動踢走 app；外人亦唔知 Apple 當時收到咩證據、有冇其他紀錄，或者內部點判斷嚴重程度。所以，一則惡意舉報未必足以穩定複製今次結果。不過只要有人成功將極嚴重違規內容塞入大型公開群組，平台確實可能同時面對內容處理同 App Store 審查兩條戰線。

Apple 規則畀咗自己好大處理空間

Apple 嘅 UGC 規則要求 app 過濾不當內容、提供舉報同封鎖功能，亦要及時處理投訴。一般情況下，指引話 Apple 會要求開發者刪內容兼交代改善方案；但遇到嚴重或者重複違規，Apple 可以即時下架，唔使預先通知。Durov 聲稱 Apple 先下架、後聯絡 Telegram，Apple 暫時冇回應呢個程序爭議。照規則文字睇，Apple 有權咁做，但開發者事前可以預計到幾多，仍然相當有限。

其他社交、討論區同通訊 app 都要留意呢個風險。內容安全團隊除咗要睇新帖，仲要追蹤舊帖編輯、異常帳戶活動同針對群組嘅協同行為；遇到高風險舉報亦要有渠道即刻同 app 商店對接。Telegram 官方話佢每日封鎖大量違規群組，亦會用雜湊資料庫掃描公開圖片，但今次仍然俾一宗個案引發短暫下架。就算平台規模再大，遇到嚴重內容問題時，Apple 仍可能即時下架，直接影響 app 分發。

參考來源